Türkmenistanyň Prezidenti
Saparmyrat Türkmenbaşy

Saparmyrat Ataýewiç Nyýazow 1940-njy ýylda Aşgabat etrabynyň Gypjak obasynda doguldy. Milleti türkmen. Bilimi ýokary, hünäri - inžener-energetik. Zähmet ýoluna 1959-njy ýylda başlady. 1967-nji ýylda Leningradyň politehniki institutyny tamamlandan soň, Büzmeýin GRES-iniň ussasy, uly ussasy bolup işledi. 1970-nji ýyldan 1985-nji ýyla çenli partiýa we sowet organlarynda jogapkärli wezipelerde işledi. 1985-nji ýylda ol Türkmenistan Ministrler Sowetiniň Başlyklygyna bellendi, şol ýylyň dekabrynda bolsa Türkmenistan Kommunistik partiýasynyň Merkezi Komitetiniň plenumynda TKP MK-nyň birinji sekretarlygyna saýlanyldy. 1990-njy ýylyň 27-nji oktýabrynda ählihalk saýlawlary netijesinde ol respublikanyň prezidentligine saýlandy. 1991-nji ýylyň maýynda Dünýä türkmenleriniň gumanitar birleşiginiň prezidentligine saýlanyldy. S.Nyýazow ykdysady we syýasy ylymlaryň doktory, professor, Türkmenistan Ylymlar Akademiýasynyň akademigidir. Halklaryň arasyndaky dostlugy we parahatçylygy pugtalandyrmakda bitiren hyzmatlary göz öňünde tutulyp, S.A.Nyýazowa birnäçe abraýly halkara baýraklary berildi.

Saparmyrat Nyýazow Magtymguly adyndaky Halkara baýragynyň birinji laureatydyr. Ol Türkmenistanyň iň ýokary tapawutlandyryş derejesi bolan Türkmenistanyň Gahrymany diýen hormatly adyň we “Altyn Aý” medalynyň üç gezek eýesidir.

1995-nji ýylyň ýanwarynda geçirilen ählihalk referendumynda türkmen halky nobatdaky saýlawlary geçirmezden Prezidentiň ygtyýarlyklaryny ikinji möhlete uzaltdy. 1999-njy ýylyň dekabrynda bolan Halk Maslahatynyň, Milli Galkynyş hereketiniň we Ýaşulular maslahatynyň bilelikdäki Mejlisi Saparmyrat Türkmenbaşyny Türkmenistanyň ömürlik Prezidenti diýip yglan etdi.