Göroglynyň edebi

Şeýle ösen, kompýuterleriň zamanasynda
ýaşap ýörkäk entek tüpeňem atyp görmedik, peýkam atyp, bili egri gylyçly gezen Görogludan edep almak mümkinmi? Göroglyny gören ýok. Wandamy, Arnold Şwaýsnegerleri bolsa her ädimde görse bolýar. Edebiýat mugallymy okaň diýip gyssap dursa-da, okap çykardan galyň “Görogly” ýaşlary, mekdep okuwçylaryny gyzyklandyrardan köne ýaly. Şeýle gussaly pikir bilen tekjede duran “Göroglyny” elime alýan. Gözi oýulyp kör galan Jygalybeg agtygynyň başyny sypap, edil ýanymda ýaly nesihat berip otyr.

Ýalňyz balam, algyn pendim,
Ýurduň terk ediji bolma.
Özüňden gaýry namardyň
Minnetin çekiji bolma.

Gyraty besle jul bile,
Oturgyn ähli il bile.
Ölinçäň bedasyl bile
Mähriban bolujy bolma.

Ýaşulular geňeş etse,
Ýagşy-ýamana göz ýetse,
Il-halkyň bir iş tutsa,
Sen ondan galyjy bolma.

Tagam berseň, bergin aja,
Daýangyn egri gylyja,
Emma duran gury agaja
Nähak gan çalyjy bolma.

Şat bol il-halkyň görende,
Sözün al, geňeş berende,
Bir garyp aglap duranda,
Ýanynda gülüji bolma.

Jygalybeg, öwüş-öwüş,
Myhman gelse, etgin söwüş.
Döwüşseň, mert bilen döwüş.
Namardy kowujy bolma...

Kitaby ýapdym. Hiç bir wideofilmiň, kompýuteriň onuň ýerini tutup bilmejekdigine bada-bat düşündim. Çünki çaganyň öz kakasyna öýkünip terbiýe alşy ýaly, tutuş milletem öz ruhy atalaryny, gahrymanlaryny, taryhy şahsyýetlerini nusga edinip terbiýelenýär. Asly päk türkmeniň şu gün bolmasa ertir, on bäşinde bolmasa ýigrimi bäşinde “Göroglyny” okamagy gutulgysyz. Ýöne näçe ir okasa her kimiň özüne bähbit, ahyrynda-da iline bähbit. Çünki il “Göroglusy” bilen, “Görogly” ýaly edebi miraslary bilen ildir.