Serdar ýoly

Beýik gara daglara ak keşde bolan ak ýola çykan türkmeniň başy gök direýär. Basgançak-basgançak ýollar diňe bir bedeniňi däl, ruhuňy ýokarlygyna garşy göterip ugraýar. Ýoluň iň belent ýerine ýeteňde bir uly eseriň iň manyly ýerine, maňzyna, manysyna ýeten ýaly bolup gidýärsiň. Çünki ol ýerde ýaşyl tug, her bir türkmenistanlyny dünýä tanadýan Garaşsyz, Bitarap Watanynyň baýdagy pasyrdap dur. Onuň pasyrdysy Watan ýüreginiň gürsüldisi mysaly. Ýaşyl tuguň ýürek urgusy Beýik Türkmenbaşynyň, Beýik türkmen Serdarynyň her bir ýol-ýörelgesiniň Watanyň şan-şöhratyny has-da belende götermekde, il-halkynyň parahat, asuda, eşretli durmuşyny gazanmakda, dostlara wepaly gol uzadyp, hiç kimi kemsitmän, hiç kimden kemsinmän ýaşamakda jemlenýändigini jar edip durana meňzeýär.

Bu ýaşyl tuguň öňünde tagzym edip geçýän halk on ýyl mundan öň Garaşsyzlygyny alyp beren Serdarynyň edil şu ak ýol ýaly pikir-paýhasyny aşakdaky ýol-ýodajyklardan ýokarda goýup bilendigine indi buýsanýar. Geçen on ýyl türkmeniň başyna gar ýagdyrmady, ojagyny öçürmedi. Gül ýüzli ýigitlerini demir tabyda saldyrmady. Saçagyny boş etmedi. Gaýta, tersine, ony elgaramalykdanam halas edip, saçagyny öz ýetişdiren ak bugdaýynyň mele nanyndan doldurdy. On ýylyň içinde Türkmenistan döwletiniň yrsgy kemelmän, berekedi artdy. Şeýle güne ýetenine şükür edýän halk neneň Serdaryny başyna täç etmesin?!

Şu ak basgançaklar ýaly barha ýokary galan ýyllar Türkmenbaşy zamanasynyň başlangyjyna öwrüldiler. Serdaryna ynanan, onuň daşyna ýyl-ýyldan berk jebisleşip, ony ömürlik Prezidenti edinen türkmen halky bu gün altyn asyryna gadam urdy. On ýyl mundan öň şeýle agzybirligiň, şeýle jebisligiň, şeýle adyl şaly bolmagyň türkmene garaşýandygyny öňünden aýtsalar ynyanylmajak zatdy. Taryhda ganygyzgyn, tireparaz, garasöýmez, alamançy-galtaman edilip görkezilip gelnen türkmenler Serdar oglunyň baştutanlygynda bary-ýogy on ýylyň içinde pikirini-güýjüni bir ýere jemläp bilýän, uruş-jenjelden daşda durup, dünýä ýüzünde bitaraplygyny ykrar etdiren Garaşsyz döwletli millet boldy. Diňe şu ýeňşi üçinem baştutanlyk edýän döwletini on ýylda şeýle garaşylmadyk derejä ýetiren Saparmyrat Türkmenbaşy Beýik Serdar diýlip atlandyrylmaga mynasypdyr. Beýik Serdarynyň ak ýoly töweregindäkiler entek aljyraňňylykdan çykyp ýetişmänkäler, sähel ýylyň içinde türkmeni edil eliň aýasynda ýaly äşgär, gör, nähili belende göterdi!

Bu ösüşi gözüň görüp durka geljek on ýylda-da Beýik Türkmenbaşynyň ýurdunda mundanam uly ösüşleriň bolup geçjekdigine şübhelenmek telek bolar. Aslyýetinde Serdar ýolunda barýarkaň, kalbyň şübhelerden saplanýar. Daglardan gaýdan sergin şemalyň seriňi durlaýşy ýaly gözýetimiňe ýerleşen Watanyň bir böleginde görýän zatlaryň ruhyňy tämizleýär. Iň bärkisi “Ýetimler köşgüne” gözüň düşende paýhasyňa durulyk gelýär. Ýetim çagalar üçin şeýle köşgi saldyran Serdaryň parahat pikirlenip bilýän, mährem ýürekli döwlet ýolbaşçysydygyny dag gerişlerini görşüň ýaly aýdyň görýärsiň. Adamkärçiligi şeýle belent ýolbaşçysy bolan ýurtda ýaşaýandygyňa buýsanýarsyň. Hakykatdanam depäň gök direýär. Serdaryň ak ýollaryndan gyşarman ýöräp, bedeniňi berkidip, ruhuňy tämizläp, hakyky watansöýüji bolup ýaşamalydygyňa düşünýärsiň.